يگرمى طوقوزنجى لمعه
Lem'alar(Os.) · Sayfa 660
Lem'alar(Os.) kitabının "يگرمى طوقوزنجى لمعه" bölümü 660. sayfada başlar. Yukarıdaki okuyucu bu sayfadan açılır; bölümün metni aşağıda basılı nüsha görünümüyle verilmiştir. Kitabın tamamı: Lem'alar(Os.).
يگرمى طوقوزنجى لمعه
ايمانه مدار عالى بر تفكّرنامه
توحيده دائر يوكسك بر معرفتنامه
﴿بِاسْمِهِ سُبْحَانَهُ﴾
قارداشلرم! بو تفكّرنامه چوق أهمّيتليدر. إمامِ علىنڭ (رض) اوڭا بر وجهده آيت الكبرا نامنى ويرمهسى، تام قيمتنى گوسترييور.
نماز تسبيحاتنده عين اليقين درجهسنده قلبه گلمش، چوق رسالهلرى نتيجه ويرمش، اوتوز سنه عقل و فكرڭ غدا و علاجى اولمش بر معرفتنامهدر.
بونى هم لمعهلر ايچنده، هم قرق أللى عدد مستقل ماكينه ايله يازيلسه مناسبدر.
سعيد النورسى
يگرمى سنه أوّل أسكيشهر حپسنده تجريدِ مطلقده ايكن يازيلان
بر لمعهدر.
﴿بِسْمِ اللّٰهِ الرَّحْمٰنِ الرَّحِيمِ﴾
﴿اَلْحَمْدُ ِللّٰهِ رَبِّ الْعَالَمِينَ ٭﴾
﴿وَ الصَّلَاةُ وَ السَّلَامُ عَلٰى سَيِّدِنَا مُحَمَّدٍ وَ عَلٰى اٰلِهِ وَ صَحْبِهِ اَجْمَعِينَ﴾
إفادهِٔ مرام
اون اوچ سنهدن بَرى قلبم، عقلم ايله إمتزاج ايدوب قرآنِ معجز البيانڭ
﴿لَعَلَّكُمْ تَتَفَكَّرُونَ ٭ لَعَلَّهُمْ يَتَفَكَّرُونَ ٭ اَوَلَمْ يَتَفَكَّرُوا فِى اَنْفُسِهِمْ مَا خَلَقَ اللّٰهُ السَّمٰوَاتِ وَ الْاَرْضَ ٭ لَاٰيَاتٍ لِقَوْمٍ يَتَفَكَّرُونَ﴾
گبى آيتلرله أمر ايتديگى تفكّر مسلگنه تشويق ايتديگى و
﴿تَفَكُّرُ سَاعَةٍ خَيْرٌ مِنْ عِبَادَةِ سَنَةٍ﴾
حديثِ شريفى بعضًا بر ساعت تفكّر بر سنه عبادت حكمنده اولديغنى بيان ايدوب، تفكّره عظيم تشويقات ياپديغى جهتله، بن ده بو اون اوچ سنهدن بَرى مسلكِ تفكّرده عقل و قلبمه تظاهر ايدن بيوك نورلرى و اوزون حقيقتلرى كنديمه محافظه ايتمك ايچون إشارت نوعندن بعض كلماتى او أنواره دلالت ايتمك ايچون دگل، بلكه وجودلرينه إشارت و تفكّرى تسهيل و إنتظامى محافظه ايچون وضع ايتدم. غايت مختلف عربى عبارهلرله كندى كنديمه او تفكّرده گيتديگم زمان، او كلماتى لسانًا ذكر ايدييوردم.
Lem'alar(Os.) uygulamada, çevrimdışı
Çevrimdışı indirme, kilit ekranı kontrolleri ve arka planda kesintisiz dinleme için ücretsiz ve reklamsız 3ondokuz uygulamasını indirin.
Uygulamayı İndir