شَمَّه

شَمَّه

(هدايتِ قرآنيه‌نڭ نسيمندن)

إعلم أيّها العزيز!

شو عالم، گورونن و گورونمه‌ين بتون طبقات و أنواعيله "لَا اِلٰهَ اِلَّا هُو" دييه توحيدى إعلان ايدييور. چونكه آرالرنده‌كى تساند بويله إقتضا ايدييور. و او طبقاتله أنواع، بتون أركانيله "لَا رَبَّ اِلَاّ هُو" دييه إعلانِ شهادت ايدييور. چونكه آرالرنده‌كى مشابهت بويله ايسته‌يور. و او أركان بتون أعضاسيله "لَا مَالِكَ اِلَّا هُو" دييه شهادتلرينى إعلان ايدييورلر. چونكه آرالرنده‌كى تماثل بويله إقتضا ايدر. و او أعضا بتون أجزاسيله "لَا مُدَبِّرَ اِلَّا هُو" دييه شهادت ايدر. چونكه آرالرنده تعاون و تداخل واردر. و او أجزا بتون جزئياتيله "لَا مُرَبِّىَ اِلَّا هُو" دييه اولان شهادتنى إعلان ايدر. چونكه آرالرنده‌كى توافق، قلمڭ بر اولديغنه دلالت ايدييور. او جزئيات بتون حجيراتيله "لَا مُتَصَرِّفَ فِى الْحَقِيقَةِ اِلَّا هُو" دييه شهادت ايدر. و او حجيرات بتون ذرّاتيله "لَا نَاظِمَ اِلَّا هُو" دييه إعلانِ شهادت ايدر. چونكه جواهرِ فرد آراسنده‌كى خيطڭ بر اولديغى بويله إقتضا ايدر. و او ذرّات بتون أثيريله "لَا اِلٰهَ اِلَّا هُو" جوهره‌سيله إعلانِ توحيد ايدر. چونكه أثيرڭ بساطتى، سكونى، إنتظامله أمرِ خالقه سرعتِ إمتثالى، بويله إقتضا ايدر.

إعلم أيّها العزيز!

هيچ بر إنسانڭ جنابِ حقّه قارشى حقِّ إعتراضى يوقدر و شكوا و شكايته ده حدّى يوقدر. چونكه شكايت ايدن فردڭ خلافِ هوسنى إقتضا ايدن نظامِ عالمده بيڭلرجه حكمت واردر. او فردى إرضا ايتمكده، او بيڭ حكمتڭ إغضابى واردر. بر فردى راضى ايتمك ايچون، بيڭ حكمت فدا ايديله‌مز.

أگر هر فردڭ كيفنه گوره حركت ايديليرسه، دنيانڭ نظام و إنتظامى فساده گيدر.

أى متشكّى! سن نه‌سڭ؟ نه‌يه بناءً إعتراض ايدييورسڭ؟ جزئى هوسڭى كلّياتِ كائناته مهندس مى ياپييورسڭ؟ قوقمش اولان ذوقڭى نعمتلرڭ درجه‌لرينه مقياس و ميزان مى ياپييورسڭ؟ نه بيلييورسڭ كه، ظن ايتديگڭ نعمت نقمت اولماسين؟ سنڭ نه قيمتڭ وار كه، سينگڭ قنادينه موازى اولميان هوسڭى تطمين و تسكين ايچون، فلك چرخلريله حركتدن تسكين ايديلسين!..

إعلم أيّها العزيز!

جسدڭ بر عضونده‌كى بر حجيره‌ده ياپيلان تصرّف، أڭ أوّل جسدى تصوّر ايتمگه متوقّفدر. چونكه كلّڭ نقشلريله، أحواليله جزئڭ چوق علاقه و مناسبتلرى واردر. اويله ايسه، جزءده تصرّف، خالقِ كلّڭ أمرى آلتنده‌در.

إعلم أيّها العزيز!

هوام، باليق گبى كوچك حيوانلرڭ يمورطه‌لرينى، حشرات و نباتاتڭ تخملرينى، پك بيوك بر رحمتله، بر لطف ايله، بر حكمتله حفظ ايدن صانعِ حكيمڭ حفيظيتنه لايق ميدر كه، آخرتده ثمره ويرن آغاجلره چكردك اولاجق أعمالڭزى حفظ ايتمه‌سين، إهمال ايتسين؟ حالبوكه سن حاملِ أمانت، خليفهٔ أرضسڭ.

أوت هر بر ذىحياتده بولونان حفظ الحيات حسّى، وجودڭ أبدى بر بقايه إسمِ حىّ، حفيظ، باقينڭ تجلّيسيله إنجرار ايده‌جگنه دلالت ايدر.

إعلم أيّها العزيز!

بر اينجير تخمنى طوردن طوره حفظ ايدن، دوردن دوره حمايه ايدن، إنحلالدن وقايه ايدن و او تخمده اينجير آغاجنڭ تشكيلاتنه لازم اولان أساسلرى كمالِ إهتمام ايله محافظه ايدن، ألبته و ألبته، خليفهِٔ أرض عنواننى آلان نوعِ بشرڭ أعمالنى إهمال ايتمز، حفظ ايدر.