حبّه

حبّه

(جنّتِ قرآنيه‌نڭ ثمراتندن بر ثمره‌نڭ إحتوا ايتديگى)

إعلم أيّها العزيز!

شو گورديگڭ بيوك عالمه بيوك بر كتاب نظريله باقيليرسه، نورِ محمّدى (عصم) او كتابڭ كاتبنڭ قلمنڭ مركّبيدر. أگر او عالمِ كبير، بر شجره تخيّل ايديليرسه، نورِ محمّدى هم چكردگى، هم ثمره‌سى اولور. أگر دنيا مجسّم بر ذىحيات فرض ايديليرسه، او نور اونڭ روحى اولور. أگر بيوك بر إنسان تصوّر ايديليرسه، او نور اونڭ عقلى اولور. أگر پك گوزل شعشعه‌لى بر جنّت باغچه‌سى تخيّل ايديليرسه، نورِ محمّدى اونڭ عندليبى اولور. أگر پك بيوك بر سراى فرض ايديليرسه، نورِ محمّدى او سلطانِ أزلڭ مقرِّ سلطنت و حشمتى و تجلّياتِ جماليه‌سيله آثارِ صنعتنى حاوى اولان او يوكسك سرايه ناظر و منادى و تشريفاتجى اولور. بتون إنسانلرى دعوت ايدييور. او سرايده بولونان بتون آنتيقه صنعتلرى، خارقه‌لرى و معجزه‌لرى تعريف ايدييور. خلقى او سراى صاحبنه، صانعنه ايمان ايتمك اوزره جاذبه‌دار، حيرتأفزا دعوت ايدييور.

إعلم أيّها العزيز!

خلقت شجره‌سنڭ ثمره‌سى إنساندر. معلومدر كه، ثمره بتون أجزانڭ أڭ أكملى و كوكدن أڭ اوزاغى اولديغى ايچون بتون أجزانڭ خاصيتلرينى، مزيتلرينى حاويدر. و كذا خلقتِ عالمڭ علّهِٔ غائيه حكمنده اولان چكردگى ينه إنساندر.

صوڭره، او شجره‌نڭ ثمره‌سى اولان إنساندن بر دانه‌سنى شجرهِٔ إسلاميته چكردك إتّخاذ ايتمشدر. ديمك او چكردك، عالمِ إسلاميتڭ هم بانيسيدر، هم أساسيدر، هم گونشيدر. فقط او چكردگڭ چكردگى قلبدر. قلبڭ إحتياجات سائقه‌سيله عالمڭ أنواعيله، أجزاسيله پك چوق علاقه‌لرى واردر. أسماءِ حسنىنڭ بتون نورلرينه إحتياجلرى واردر. دنيايى طولديره‌جق قدر او قلبڭ هم أمللرى، هم ده دشمنلرى واردر. آنجق، غنىِّ مطلق و حافظِ حقيقى ايله إطمئنان ايده‌بيلير.

و كذا او قلبڭ اويله بر قابليتى واردر كه، بر خريطه ويا بر فهرسته گبى بتون عالمى تمثيل ايدر. و واحدِ أحددن باشقه مركزنده بر شيئى قبول ايتمييور. أبدى، سرمدى بر بقادن ماعدا بر شيئه راضى اولمايور.

إنسانڭ چكردگى اولان قلب، عبوديت و إخلاص آلتنده إسلاميت ايله إسقا ايديلمكله ايمانله إنتباهه گليرسه، نورانى، مثالى عالمِ أمردن گلن أمر ايله اويله بر شجرهِٔ نورانى اولارق يشيلله‌نير كه· اونڭ جسمانى عالمنه روح اولور. أگر او قلب چكردگى بويله بر تربيه گورمزسه، قورو بر چكردك قالارق نوره إنقلاب ايدنجه‌يه قدر آتش ايله يانماسى لازمدر.

و كذا او حبّهِٔ قلب ايچون، پك چوق خدمتجى واردر كه، او خادملر قلبڭ حياتيله حيات بولوب إنبساط ايدرلرسه، قوجه‌مان كائنات اونلره تنزّه و سيرانگاه اولور. حتّى قلبڭ خادملرندن بولونان خيال (مثلا) أڭ ضعيف، أڭ قيمتسز ايكن، حپسده و زندانده قيدلى اولان صاحبنى بتون دنياده گزديرر، فرحلانديرر. و شرقده نماز قيلانڭ باشنى حجر الأسودڭ آلتنه قويديرر. و شهادتلرينى حجر الأسوده محافظه ايچون توديع ايتديرر.