رسالهِٔ نوردن پارلاق فقره‌لر

رسالهِٔ نوردن پارلاق فقره‌لر

و

بر قسم گوزل مكتوبلر

ليلهِٔ قدرده إخطار ايديلن بر مسئلهِٔ مهمّه

أوّلا:

ليلهِٔ قدرده قلبه گلن پك اوزون و گنيش بر حقيقته پك قيصه‌جه بر إشارت ايده‌جگز. شويله كه:

نوعِ بشر بو صوڭ حربِ عمومينڭ أشدِّ ظلم و إستبداد ايله و مرحمتسز تخريبات ايله و بر دشمنڭ يوزندن يوزر معصومى پريشان ايتمه‌سيله و مغلوبلرڭ دهشتلى مأيوسيتلريله و غالبلرڭ دهشتلى تلاش و حاكميتلرينى محافظه و بيوك تخريباتلرينى تعمير ايده‌مه‌ملرندن گلن دهشتلى وجدان عذابلريله و دنيا حياتنڭ بتون بتون فانى و موقّت اولماسى و مدنيت فانتازيه‌لرينڭ آلداتيجى و اويوتوجى اولماسى عمومه گورونمه‌سيله و فطرتِ بشريه‌ده‌كى يوكسك إستعداداتڭ، ماهيتِ إنسانيه‌سنڭ عمومى بر صورتده دهشتلى ياره‌لانمسيله و أبدپرست حسّياتِ باقيه و فطرى عشقِ إنسانيه‌نڭ هيجان ايچنده اويانماسيله، و غفلت و ضلالتڭ، أڭ سرت، صاغير اولان طبيعتڭ، قرآنڭ ألماس قلنجى آلتنده پارچه‌لانماسيله و غفلت و ضلالتڭ أڭ بوغوجى، آلداتيجى أڭ گنيش پرده‌سى اولان سياستڭ روىِ زمينده پك چركين، پك غدّارانه حقيقى صورتى گورونمه‌سيله ألبته و ألبته هيچ بر شبهه يوق كه: شمالده، غربده، آمريقاده أماره‌لرى گورونديگنه بناءً نوعِ بشرڭ معشوقِ مجازيسى اولان حياتِ دنيويه بويله چركين و گچيجى اولماسندن، فطرةً بشرڭ حقيقى سَوْديگى و آراديغى حياتِ باقيه‌يى بتون قوّتيله آرايه‌جق. و ألبته هيچ شبهه يوق كه: بيڭ اوچ يوز آلتمش سنه‌ده، هر عصرده اوچ يوز أللى ميليون شاكردى بولونان و هر حكمنه و دعواسنه ميليونلر أهلِ حقيقت تصديق ايله إمضا باصان و هر دقيقه‌ده ميليونلر حافظلرڭ قلبنده قدسيت ايله بولونوب لسانلريله بشره درس ويرن و هيچ بر كتابده أمثالى بولونميان بر طرزده، بشر ايچون حياتِ باقيه‌يى و سعادتِ أبديه‌يى مژده ويروب بتون بشرڭ ياره‌لرينى تداوى ايدن قرآنِ معجز البيانڭ شدّتلى، قوّتلى و تكرارلى بيڭلر آياتيله، بلكه صريحًا و إشارةً اون بيڭلر دفعه دعوا ايدوب خبر ويروب صارصيلماز قطعى دليللرله، شبهه گتيرمز حدسز حجّتلرله حياتِ باقيه‌يى قطعيتله مژده و سعادتِ أبديه‌يى درس ويرمه‌سى، ألبته نوعِ بشر، بتون بتون عقلنى غائب ايتمزسه و مادّى و معنوى بر قيامت باشلرنده قوپمازسه· إسوه‌چ، نوروه‌چ، فينلانديا و إنگلتره‌نڭ قرآنڭ قبولنه چاليشان مشهور خطيبلرى و دينِ حقّى آرايان آمريقانڭ چوق أهمّيتلى جمعيتى گبى روىِ زمينڭ قطعه‌لرى و حكومتلرى قرآنِ معجز البيانى آرايه‌جقلر و حقيقتلرينى آڭلادقدن صوڭره بتون روح و جانلريله صاريلاجقلر. چونكه بو حقيقت نقطه‌سنده قطعيًا قرآنڭ مِثلى يوقدر و اولاماز و هيچ بر شى بو معجزهِٔ أكبرڭ يرينى طوتاماز.

ثانيًا:

مادام رسالهِٔ نور او معجزهِٔ كبرانڭ ألنده بر ألماس قلنج حكمنده خدمتنى گوسترمش و أڭ معنّد دشمنلرى تسليمه مجبور ايتمش. هم قلبى، هم روحى، حتّى حسّياتى تام تنوير ايده‌جك و علاجلرينى ويره‌جك بر طرزده خزينهِٔ قرآنيه‌نڭ دلاّللغنى ياپان و اوندن باشقه مأخذ و مرجعى اولميان بر معجزهِٔ معنويه‌سى بولونان رسالهِٔ نور او وظيفه‌يى ياپييور و عليهنده دهشتلى پروپاغنده‌لره و غايت معنّد زنديقلره تام غلبه چالمش و ضلالتڭ أڭ سرت و قوّتلى قلعه‌سى اولان طبيعتى، طبيعت رساله‌سيله پارچه پارچه ايتمش و غفلتڭ أڭ قالين و بوغوجى و گنيش دائرهِٔ آفاقنده و فنّڭ أڭ گنيش پرده‌لرنده عصاىِ موسىده‌كى ميوه‌نڭ آلتنجى مسئله‌سى و برنجى، ايكنجى، اوچنجى و سكزنجى حجّتلريله غايت پارلاق بر طرزده غفلتى طاغيتوب نورِ توحيدى گوسترمش. ألبته بزلره لازم و ملّته ألزمدر كه شيمدى رسمًا إذن ويريلن دين تدريساتى ايچون خصوصى درسخانه‌لر آچيلمه‌سنه و إذن ويريلمسنه بناءً، نور شاكردلرى ممكن اولديغى قدر هر يرده كوچوجك درسخانهِٔ نوريه آچمق لازمدر. گرچه هركس كندى كندينه بر درجه إستفاده ايدر، فقط هركس هر بر مسئله‌سنى تام آڭلاماز. هم ايمان حقيقتلرينڭ ايضاحى اولديغى ايچون· هم علم،

﴿ (حاشيه): شايد برى بيلييور، تعلّم ايتمگه محتاج دگلسه عبادته محتاج ويا معرفته مشتاق ويا حضور ايستر. اونڭ ايچون هركسه لزوملى بر درسدر.﴾

هم معرفت، هم عبادتدر. أسكى مدرسه‌لرده بش اون سنه‌يه مقابل، إن شاء اللّٰه نور مدرسه‌لرى بش اون هفته‌ده عين نتيجه‌يى تأمين ايده‌جك و يگرمى سنه‌در ايدييور. و هم حكومت و ملّت و وطن، هم حياتِ دنيويه‌سنه و سياسيه‌سنه و اُخرويه‌سنه پك چوق فائده‌سى بولونان بو قرآن لمعاتلرينه و دلاّلى بولونان رسالهِٔ نوره دگل ايليشمك، تماميله ترويج و نشرينه چاليشمالرى ألزمدر كه· گچن دهشتلى گناهلره كفّارت و گله‌جك مدهش بلالره و آنارشيستلگه بر سد اولابيلسين.