ايكنجى باب

ايكنجى باب

(براهينِ توحيديه‌يه دائردر.)

دنيايه ايمان ايچون گوندريلن و بتون كائناتده فكرًا سياحت ايدن و هر شيدن خالقنى صوران و هر يرده ربّنى آرايان و حقّ اليقين درجه‌سنده إلٰهنى وجوبِ وجود نقطه‌سنده بولان دنيا مسافرى، كندى عقلنه ديدى كه: گل، واجب الوجود خالقمزڭ وحدت برهانلرينى تماشا ايچون ينه برابر بر سياحته گيده‌جگز.

برابر گيتديلر. برنجى منزلده گورديلر كه: كائناتى إستيلا ايدن درت حقيقتِ قدسيه، وحدتى بداهت درجه‌سنده إستلزام ايدوب ايسترلر.

برنجى حقيقت: "الوهيتِ مطلقه"در.

أوت نوعِ بشرڭ هر طائفه‌سى برر نوع عبادت ايله فطرى گبى مشغول اولماسى و سائر ذىحياتڭ، بلكه جماداتڭ دخى فطرى خدمتلرى برر نوع عبادت حكمنده بولونماسى و كائناتده مادّى و معنوى بتون نعمتلرڭ و إحسانلرڭ هر برى، بر معبوديت طرفندن، حمد و عبادتى ياپديران پرستشه و شكره برر وسيله اولمالرى و وحى و إلهاملر گبى بتون ترشّحاتِ غيبيه و تظاهراتِ معنويه‌نڭ بر تك إلٰهڭ معبوديتنى إعلان ايتمه‌لرى· ألبته و بداهتله بر الوهيتِ مطلقه‌نڭ تحقّقنى و حكمفرما اولديغنى إثبات ايدرلر. مادام بويله بر الوهيت حقيقتى وار، ألبته إشتراكى قبول ايده‌مز. چونكه الوهيته يعنى معبوديته قارشى شكر و عبادتله مقابله ايدنلر، كائنات آغاجنڭ أڭ نهايتلرنده بولونان ذىشعور ميوه‌لريدر و باشقه‌لرڭ او ذىشعورلرى ممنون و منّتدار ايدوب يوزلرينى كنديلرينه چويرمه‌سى و گورونمديگندن چابوق اونوتديريلابيلن حقيقى معبودلرينى اونلره اونوتديرماسى، الوهيتڭ ماهيتنه و قدسى مقصدلرينه اويله بر ضدّيتدر كه، هيچ بر جهتله مساعده ايتمز. قرآنڭ چوق تكرار ايله و شدّتله شركى ردّ و مشركلرى جهنّم ايله تهديد ايتمه‌سى، بو جهتدندر.

ايكنجى حقيقت: "ربوبيتِ مطلقه"در.

أوت بتون كائناتده خصوصًا ذىحياتلرده و بِالخاصّه تربيه و إعشه‌لرنده هر طرفده عين طرزده و اومولمدق بر صورتده برابر و بربرى ايچنده حكيمانه، رحيمانه بر دستِ غيبى طرفندن اولان بر تصرّفِ عام ألبته بر ربوبيتِ مطلقه‌نڭ ترشّحيدر و ضياسيدر و تحقّقنه بر برهانِ قطعيدر. مادام بر ربوبيتِ مطلقه واردر، ألبته شرك و إشتراكى قبول ايتمز. چونكه او ربوبيتڭ كندى جمالنى إظهار و كمالاتنى إعلان و قيمتلى صنعتلرينى تشهير و گيزلى هنرلرينى گوسترمك گبى أڭ مهمّ مقصد و غايه‌لرى جزئياتده و ذىحياتده تمركز و إجتماع ايتديگندن، أڭ جزئى بر شيئه و أڭ كوچك بر ذىحياته كندى باشيله مداخله ايدن بر شرك، او غايه‌لرى بوزار و او مقصدلرى خراب ايدر. و ذىشعورڭ يوزلرينى او غايه‌لردن و او غايه‌لرى إراده ايدندن چويروب أسبابه صالديغندن و بو وضعيت ربوبيتڭ ماهيتنه بتون بتون مخالف و عداوت اولديغندن، ألبته بويله بر ربوبيتِ مطلقه، هيچ بر جهتله شركه مساعده ايتمز. قرآنڭ كثرتلى تقديساتى و تسبيحاتى و آياتى و كلماتى، بلكه حروفاتى و هيئاتيله متماديًا توحيده إرشاداتى بو بيوك سردن ايلرى گلمشدر.