دردنجى نكته

دردنجى نكته:

دييورسڭ: بنم طعاملره، نفسمه، رفيقه‌مه، والديْنمه، أولاديمه، أحبابمه، أوليايه، أنبيايه، گوزل شيلره، بهاره، دنيايه متعلّق آيرى آيرى مختلف محبّتلريمڭ (قرآنڭ أمر ايتديگى طرزده اولسه) نتيجه‌لرى، فائده‌لرى نه‌در؟

الجواب:

بتون نتيجه‌لرى بيان ايتمك ايچون بيوك بر كتاب يازمق لازم گلير. شيمديلك يالڭز إجمالاً بر ايكى نتيجه‌يه إشارت ايديله‌جك. أوّلا، دنياده‌كى معجّل نتيجه‌لرى بيان ايديله‌جك. صوڭره آخرتده تظاهر ايدن نتيجه‌لرى ذكر ايديله‌جك. شويله كه:

سابقًا بيان ايديلديگى گبى· أهلِ غفلت و أهلِ دنيا طرزنده و نفس حسابنه اولان محبّتلرڭ· دنياده بلالرى، ألملرى، مشقّتلرى چوقدر. صفالرى، لذّتلرى، راحتلرى آزدر. مثلا: شفقت، عجز يوزندن ألملى بر مصيبت اولور. محبّت، فراق يوزندن بلالى بر حرقت اولور. لذّت، زوال يوزندن زهرلى بر شربت اولور. آخرتده ايسه· جنابِ حقّڭ حسابنه اولمادقلرى ايچون، يا فائده‌سزدر ويا عذابدر. (أگر حرامه گيرمش ايسه.)

سؤال:

أنبياء و أوليايه محبّت، ناصل فائده‌سز قالير؟

الجواب:

أهلِ تثليثڭ عيسى عليه السلامه و رافضيلرڭ حضرتِ على رضى اللّٰه عنهه محبّتلرى فائده‌سز قالديغى گبى.

أگر او محبّتلر، قرآنڭ إرشاد ايتديگى طرزده و جنابِ حقّڭ حسابنه و محبّتِ رحمٰن نامنه اولسه‌لر، او زمان هم دنياده، هم آخرتده گوزل نتيجه‌لرى وار. امّا دنياده ايسه لذيذ طعاملره، گوزل ميوه‌لره محبّتڭ، ألمسز بر نعمت و عينِ شكر بر لذّتدر.

نفسڭه محبّت ايسه: اوڭا آجيمق، تربيه ايتمك، ضررلى هوساتدن منع ايتمكدر. او وقت نفس سڭا بينمز، سنى هواسنه أسير ايتمز. بلكه سن نفسڭه بينرسڭ. اونى هوايه دگل، هدايه سَوق ايدرسڭ.

رفيقهِٔ حياتڭه محبّتڭ، مادام حسنِ سيرت و معدنِ شفقت و هديهِٔ رحمت اولديغنه بنا ايديلمش. او رفيقه‌يه صميمى محبّت و مرحمت ايدرسه‌ڭ، او ده سڭا جدّى حرمت و محبّت ايدر. ايكيڭز إختيار اولدقجه او حال زياده‌لشير، مسعودانه حياتڭى گچيررسڭ. يوقسه حسنِ صورته محبّت نفسانى اولسه، او محبّت چابوق بوزولور، حسنِ معاشرتى ده بوزار.

پدر و والده‌يه قارشى محبّتڭ، جنابِ حق حسابنه اولديغى ايچون هم بر عبادت، هم ده اونلر إختيارلندقجه حرمت و محبّتى زياده‌لشديررسڭ. أڭ عالى بر حسّ ايله، أڭ مردانه بر همّت ايله اونلرڭ طولِ عمرينى جدّى آرزو ايدوب بقالرينه دعا ايتمك، تا اونلرڭ يوزندن داها زياده ثواب قزانه‌يم دييه صميمى حرمتله اونلرڭ ألنى اوپمك، علوى بر لذّتِ روحانى آلمقدر. يوقسه نفسانى، دنيا إعتباريله اولسه، اونلر إختيار اولدقلرى و سڭا بار اولاجق بر وضعيته گيردكلرى زمان· أڭ سفلى و أڭ آلچاق بر حسّ ايله وجودلرينى إستثقال ايتمك، سببِ حياتڭ اولان او محترم ذاتلرڭ موتلرينى آرزو ايتمك گبى وحشى، كدرلى، روحانى بر ألمدر.

أولاديڭه محبّت ايسه: جنابِ حقّڭ سنڭ نظارتڭه و تربيه‌ڭه أمانت ايتديگى سَويملى، انسيتلى او مخلوقلره محبّت ايسه· سعادتلى بر محبّت، بر نعمتدر. نه مصيبتلريله فضله ألم چكرسڭ، نه ده ئولوملريله مأيوسانه فرياد ايدرسڭ. سابقًا گچديگى گبى· اونلرڭ خالقلرى هم حكيم، هم رحيم اولديغندن، اونلر حقّنده او موت بر سعادتدر ديرسڭ. سنڭ حقّڭده ده، اونلرى سڭا ويرن ذاتڭ رحمتنى دوشونورسڭ، فراق ألمندن قورتولورسڭ.