اون اوچنجى سوزڭ ايكنجى مقامى

اون اوچنجى سوزڭ ايكنجى مقامى

(جاذبه‌دار بر فتنه ايچنده بولونان و داها عقلنى غائب ايتمه‌ين بعض گنجلرله بر محاوره‌در.)

بر قسم گنجلر طرفندن شيمديكى آلداتيجى و جاذبه‌دار لهويات و هوساتڭ هجوملرى قارشيسنده "آخرتمزى نه صورتله قورتاره‌جغز؟" دييه، رسالهِٔ نوردن مدد ايستديلر. بن ده رسالهِٔ نورڭ شخصِ معنويسى نامنه اونلره ديدم كه: قبر وار، هيچ كيمسه إنكار ايده‌مز. هركس ايستر ايسته‌مز اورايه گيره‌جك. و اورايه گيرمك ايچون ده اوچ طرزده اوچ يولدن باشقه يول يوق.

برنجى يول:

او قبر، أهلِ ايمان ايچون بو دنيادن داها گوزل بر عالمڭ قپوسيدر.

ايكنجى يول:

آخرتى تصديق ايدن، فقط سفاهت و ضلالتده گيدنلره، بر حپسِ أبدى و بتون دوستلرندن بر تجريد ايچنده بر حپسِ منفرد، يالڭز باشنه بر حپس قپوسيدر. اويله گورديگى و إعتقاد ايتديگى و اينانديغى گبى حركت ايتمديگى ايچون اويله معامله گوره‌جك.

اوچنجى يول:

آخرته اينانميان أهلِ إنكار و ضلالت ايچون بر إعدامِ أبدى قپوسى... يعنى هم كنديسنى، هم بتون سَوْدكلرينى إعدام ايده‌جك بر دار آغاجيدر. اويله بيلديگى ايچون، جزاسى اولارق عيننى گوره‌جك. بو ايكى شق بديهيدر، دليل ايسته‌مييور، گوز ايله گورونور.

مادام أجل گيزليدر· هر وقت ئولوم، باشنى كسمك ايچون گله‌بيلييور و گنج إختيار فرقى يوقدر. ألبته دائما گوزى اوڭنده اويله بيوك دهشتلى بر مسئله قارشيسنده بيچاره إنسان· او إعدامِ أبدى، او ديبسز، نهايتسز حپسِ منفرددن قورتولمق چاره‌سنى آرامق و قبر قپوسنى بر عالمِ باقىيه، بر سعادتِ أبديه‌يه و عالمِ نوره آچيلان بر قپويه كندى حقّنده چويرمك حادثه‌سى· او إنسانڭ دنيا قدر بيوك بر مسئله‌سيدر.

بو قطعى حقيقت، بو اوچ يول ايله بولونديغنده و بو اوچ يولڭ ده مذكور اوچ حقيقت ايله اولاجغنى إخبار ايدن يوز يگرمى درت بيڭ مخبرِ صادق، أللرنده نشانهِٔ تصديق اولان معجزه‌لر بولونان أنبيالر و او أنبيالرڭ خبر ويردكلرى عين خبرلرى، كشف و ذوق و شهود ايله تصديق ايدن و إمضا باصان يوز يگرمى درت ميليون أوليانڭ عين حقيقته شهادتلرى و حدّ و حسابه گلمه‌ين محقّقلرڭ، قطعى دليللريله (او أنبيا و أوليانڭ ويردكلرى عين خبرلرى) عقلاً علم اليقين درجه‌سنده

﴿ (٭): اونلردن بريسى رسالهِٔ نوردر. ميدانده‌در.﴾

إثبات ايتدكلرى و يوزده طقسان طوقوز إحتمالِ قطعى ايله "إعدام و زندانِ أبديدن قورتولمق و او يولى سعادتِ أبديه‌يه چويرمك، يالڭز ايمان و إطاعت ايله‌در." دييه إتّفاقًا خبر ويرييورلر.

عجبا يوزده بر إحتمالِ هلاكت بولونان بر تهلكه يولنده گيتمه‌مك ايچون، بر تك مخبرڭ سوزى نظره آلينسه و اونڭ سوزينى ديڭله‌ميوب او يولده گيدن آدمڭ، أنديشهِٔ هلاكتدن گلن ألمِ معنوى، اونڭ يمك إشتهاسنى قاچيرديغى حالده· بويله يوز بيڭلر صادق و مصدّق مخبرلرڭ يوزده يوز إحتمال ايله، ضلالت و سفاهت گوز اوڭنده‌كى قبر دار آغاجنه و أبدى حپسِ منفردينه قطعى سبب اولديغنى و ايمان، عبوديت يوزده يوز إحتمال ايله او دار آغاجنى قالديروب، او حپسِ منفردى قپاتوب، شو گوز اوڭنده‌كى قبرى، بر خزينهِٔ أبديه‌يه، بر سراىِ سعادته آچيلان بر قپويه چويرييور دييه إخبار ايدن و أماره‌لرينى و آثارلرينى گوستردكلرى حالده، بو عجيب و غريب و دهشتلى و عظمتلى مسئله قارشيسنده بولونان بيچاره إنسان و باخصوص مسلمان أگر ايمان و عبوديتى اولمازسه، بتون دنيا سلطنتى و لذّتى بر تك إنسانه ويريلسه· عجبا او گوز اوڭنده‌كى، هر وقت اورايه چاغريلماسنه نوبتنى بكله‌ين بر إنسانه ويرديگى او أنديشه‌دن گلن أليم ألمى قالديره‌بيلير مى؟ سزدن صورويورم.