رسالهِٔ نور ميزانلرندن اون اوچنجى سوزڭ ايكنجى مقامنڭ حاشيه‌سيدر

رسالهِٔ نور ميزانلرندن اون اوچنجى سوزڭ ايكنجى مقامنڭ حاشيه‌سيدر

رسالهِٔ نورده‌كى حقيقى تسلّىيه محبوسلر چوق محتاجدرلر. خصوصًا گنجلك ضربه‌سنى ييوب، تازه و شيرين عمرينى حپسده گچيرنلرڭ، نورلره أكمك قدر إحتياجلرى وار. أوت گنجلك طمارى، عقلدن زياده حسّياتى ديڭلر... حسّ و هوس ايسه كوردر، عاقبتى گورمز. بر درهم حاضر لذّتى، ايلريده بر بطمان لذّته ترجيح ايدر. بر دقيقه إنتقام لذّتى ايله قتل ايدر، سكسان بيڭ ساعت حپس ألملرينى چكر. و بر ساعت سفاهت كيفيله بر ناموس مسئله‌سنده· بيڭلر گون هم حپسڭ، هم دشمنڭ أنديشه‌سندن صيقنتيلرله عمرينڭ سعادتى محو اولور. بونلره قياسًا بيچاره گنجلرڭ چوق وارطه‌لرى وار كه: أڭ طاتلى حياتنى، أڭ آجى و آجينه‌جق بر حياته چويرييورلر و بِالخاصّه شمالده قوجه بر دولت، گنجلك هوساتنى ألده ايده‌رك، بو عصرى فورطنه‌لريله صارصييور. چونكه عاقبتى گورمه‌ين كور حسّياتله حركت ايدن گنجلره، أهلِ ناموسڭ گوزل قيزلرينى و قاريلرينى إباحه ايدر. بلكه حماملرنده أركك قادين برابر چيپلاق اولارق گيرمه‌لرينه إذن ويرمه‌لرى جهتنده بو فحشياتى تشويق ايدر. هم سرسرى و فقير اولانلره، زنگينلرڭ ماللرينى حلال ايدر كه· بتون بشر بو مصيبته قارشى تيتره‌يور.

ايشته بو عصرده إسلام و تورك گنجلرى قهرمانانه طاورانوب ايكى جهتدن هجوم ايدن بو تهلكه‌يه قارشى، رسالهِٔ نورڭ ميوه و گنجلك رهبرى گبى كسكين قليچلريله مقابله ايتمه‌لرى ألزمدر. يوقسه او بيچاره گنج، هم دنيا إستقبالنى، هم مسعود حياتنى، هم آخرتده‌كى سعادتنى و حياتِ باقيه‌سنى عذابلره، ألملره چويروب محو ايدر و سوءِ إستعمال و سفاهتله خسته‌خانه‌لره و حسّياتڭ طاشقينلقلريله حپسخانه‌لره دوشر. أيواهلر، أسفلر ايله إختيارلغنده چوق آغلايه‌جق. أگر تربيهِٔ قرآنيه و نورڭ حقيقتلريله كندينى محافظه أيله‌سه، تام بر قهرمان گنج و مكمّل بر إنسان و مسعود بر مسلمان و سائر ذىحياتلره، حيوانلره بر نوع سلطان اولور.

أوت بر گنج، حپسده يگرمى درت ساعت هر گونكى عمرندن تك بر ساعتنى بش فرض نمازينه صرف ايتسه و أكثر گناهلردن حپس مانع اولديغى گبى او مصيبته سببيت ويرن خطادن دخى توبه ايدوب سائر ضررلى، ألملى گناهلردن چكيلسه· هم حياتنه، هم إستقبالنه، هم وطننه، هم ملّتنه، هم أقرباسنه بيوك بر فائده‌سى اولماسى گبى او اون – اونبش سنه‌لك فانى گنجلكله أبدى پارلاق بر گنجلگى قزانه‌جغنى، باشده قرآنِ معجز البيان، بتون كتب و صحفِ سماويه قطعى خبر ويروب مژده ايدييورلر.

أوت او شيرين، گوزل گنجلك نعمتنه إستقامتله، طاعتله شكر ايتسه· هم زياده‌لشير، هم باقيله‌شير، هم لذّتله‌نير. يوقسه هم بلالى اولور، هم ألملى، غملى، كابوسلى اولور، گيدر. هم أقرباسنه، هم وطننه، هم ملّتنه مضر بر سرسرى حكمنه گچيرمگه سببيت ويرر.

أگر محبوس، ظلمًا محكوم اولمش ايسه، فرض نمازينى قيلمق شرطيله، هر بر ساعتى، بر گون عبادت اولديغى گبى، او حپس اونڭ حقّنده بر چلّه‌خانهِٔ عزلت اولوب أسكى زمانده مغاره‌لره گيره‌رك عبادت ايدن منزوى صالحلردن صاييلابيليرلر.