اون يدنجى سوزڭ ايكنجى مقامى
Sözler(Os.) · Sayfa 263
Sözler(Os.) kitabının "اون يدنجى سوزڭ ايكنجى مقامى" bölümü 263. sayfada başlar. Yukarıdaki okuyucu bu sayfadan açılır; bölümün metni aşağıda basılı nüsha görünümüyle verilmiştir. Kitabın tamamı: Sözler(Os.).
اون يدنجى سوزڭ ايكنجى مقامى
﴿ (حاشيه): بو ايكنجى مقامدهكى پارچهلر شعره بڭزر، فقط شعر دگللر. قصدى نظم ايديلمهمشلر. بلكه حقيقتلرڭ كمالِ إنتظامى جهتنده، بر درجه منظوم صورتنى آلمشلر.﴾
يراق بيچاره فريادى، بلادن گل توكّل قيل!
زيرا فرياد، بلا أندر، خطا أندر بلادر بيل!
بلا ويرنى بولدڭسه، عطا أندر، صفا أندر بلادر بيل!
بيراق فريادى، شكر قيل مانندِ بلابل، دما كيفندن گولر هپ گُل مُل.
گر بولمازسهڭ، بتون دنيا جفا أندر، فنا أندر هبادر بيل!
جهان طولو بلا باشنده واركن، نه باغيررسڭ كوچك بر بلادن، گل توكّل قيل!
توكّل ايله بلا يوزنده گول، تا او ده گولسون.
او گولدكجه كوچولور، ايدر تبدّل.
بيل أى خودگام! بو دنياده سعادت، تركِ دنياده.
خدابين ايسهڭ، او كافيدر، بيراقسهڭ ده بتون أشيا لهنده.
گر خودبين ايسهڭ، هلاكتدر، نه ياپارسهڭ بتون أشيا عليهنده.
ديمك تركى گركدر هر ايكى حالده بو دنياده.
تركى ديمك: خدا ملكى، اونڭ إذنى، اونڭ ناميله باقمقده.
تجارت ايستهيورسهڭ گر، شو فانى عمريڭى باقىيه تبديلده.
گر نفسڭه طالب ايسهڭ، چوروكدر هم تملسز ده.
أگر آفاقى ايستر ايسهڭ، فنا طامغهسى اوستنده.
ديمك دگمز كه آلينسه، چوروك مالدر هپ بو چارشوده.
اويله ايسه گچ، ايى ماللر ديزيلمش آرقهسنده...
سياه طوتڭ بر ميوهسى
(او مبارك طوت باشنده أسكى سعيد، يڭى سعيد لسانيله سويلهمشدر.)
خاطبم ضيا پاشا دگل، آوروپا مفتونلريدر.
متكلّم نفسم دگل، تلميذِ قرآن نامنه قلبمدر.
گچن سوزلر حقيقتدر، صاقين شاشمه، حدودندن حذر آشمه،
أجانب فكرينه صاپمه، ضلالتدر قولاق آصمه، ايدر ألبت سنى نادم.
گورورسڭ أڭ ضيادارڭ، ذكاوتده علمدارڭ،
او حيرتدن دير دائم: "أيواه، كيمدن كيمه شكوا ايدهيم بن دخى شاشدم!"
قرآن ديديرتير بن ده ديرم، هيچ ده چكينمم.
اوندن اوڭا شكوا ايدرم سن گبى شاشمام.
حقدن حقّه فرياد ايدرم، سن گبى آشمام،
يردن گوگه دعوا ايدرم، سن گبى قاچمام.
كه، قرآنده هپ دعوا نوردن نورهدر، سن گبى جايمام.
قرآندهدر حق حكمت، إثبات ايدرم، مخالف فلسفهيى بش پاره صايمام.
فرقاندهدر ألماس حقيقت، درجان ايدرم، سن گبى صاتمام.
خلقدن حقّه سيران ايدرم، سن گبى صاپمام.
تيكنلى يولده طيران ايدرم، سن گبى باصمام.
رشدن عرشه شكران ايدرم، سن گبى آصمام.
Alt başlıklar
Sözler(Os.) uygulamada, çevrimdışı
Çevrimdışı indirme, kilit ekranı kontrolleri ve arka planda kesintisiz dinleme için ücretsiz ve reklamsız 3ondokuz uygulamasını indirin.
Uygulamayı İndir